Kthehu lart

Pas 5 viteve në krye të komunës, kryetari i Kërçovës vizitohet për herë të parë nga një ministër maqedonas

Pas 5 viteve në krye të komunës, kryetari i Kërçovës vizitohet për herë të parë nga një ministër maqedonas GazetaExpress

Kryetari i Komunës së Kërçovës, Fatmir Dehari po ushtron mandatin e tij të dytë si kryetar komune, por pas 5 viteve në qeverisje këtë të enjte për herë të parë vizitohet nga një ministër maqedonas.

Një delegacion nga Ministria e Transportit dhe Lidhje, i udhëhequr nga ministri Zoran Sugarevski, ka qëndruar dje për vizitë në komunën e Kërçovës, ku takoi edhe Deharin.

“Sot prita në takim pune Ministrin e Transportit dhe Lidhjeve z.Goran Sugareski, qëllimi i takimit ishte informimi për projektet e realizuara, projektet aktuale dhe mundësitë e bashkëpunimt në të ardhmen”, tha pas takimit me ministrin Sugarevski, kreu i Kërçovës, Fatmir Dehari.

Palët gjatë takimit biseduan për projektet e realizuara deri më tani në Komunën e Kërçovës dhe projektet e ardhshme të cilat mund të realizohen bashkërisht mes komunës dhe ministrisë në fjalë.

Mandati i parë i Deharit filloi në qeverisjen e VMRO-DMPNE, dhe për aq kohë Dehari ishte bojkotuar në heshtje nga ministrat dhe kryeministri maqedonas tashmë në azil politik në Hungari, Nikolla Gruevski. Në vitin 2017 në qeverisje erdhi LSDM me në krye Zoran Zaevin, ndërsa më vonë atë vit Dehari përtëriu mandatin e kryetarit të komunës në zgjedhjet lokale.

Kujtojmë që Dehari ishte në një betejë të ashpër politike në zgjedhjet për Kryetar komune me partinë maqedonase, VMRO-DPMNE, si në vitin 2013 ashtu edhe në vitin 2017. Madje, në përgjimet e publikuara në një nga bisedat, ministrat e atëhershëm të VMRO-DPMNE-së së Nikolla Gruevskit, Mile Janakievski dhe Gordana Jankulovska, flasin për ardhjen e dy aeroplanëve me votues shqiptarë në Ohër dhe përgatisin strategji se si t’i pengojnë ata të ushtrojnë të drejtën e tyre të votës.

Ata kanë menduar që t’i nxjerrin ngadalë udhëtarët apo t’i mbajnë më gjatë në pistë që të mos arrijnë të votojnë. Pas kësaj, Janakievski bisedon me një punonjës të kompanisë TAV, i cili i thotë ish-ministrit se është më mirë që “kontrolli i fluturimit t’i mbajë në ajër më gjatë në qiell “.

Në një bisedë tjetër, ish ministrat e transportit dhe lidhjes dhe ajo e policisë japin propozime të tjera. Janakievski thotë të bëhet një aksident në rrugën për në Kërçovë, ndërsa Jankulovska jep ide që të përmbyset një kamion me rërë, sepse në votim do të shkojnë me makina./Aktuale.mk/

    Data: 07 Dhjetor 2018 17:07
    Autori: GazetaExpress

    Të tjera