Shtatë herë kampioni i botës në Formula 1, Lewis Hamilton do ta vazhdojë karrierën e tij tek Ferrari.
Hamiltoni që është pilot i Mercedesit është afër marrëveshjes me Ferrarin, të cilin mund ta drejtojë nga viti 2025, shkruan Gazeta Express.
39-vjeçari dëshiron të jetë në një ekip që mund t’i sigurojë atij një makinë konkurruese për të fituar titullin e tetë kampion para se të përfundojë karrierën.
Carlos Sainz do të largohet nga Ferrari në fund të sezonit, pasi negociatat për vazhdimin e bashkëpunimit dështuan.
Hamilton do të voziste Ferrarin së bashku me Charles Leclerc, i cili ka kontratë shumëvjeçare me skuderinë e famshme italiane. Ferrari për herë të fundit e fitoi titullin në vitin 2007.
Në vitet e mëparshme spekulohej se Hamiltoni mund të kalonte te Ferrari dhe në Mercedes thuhej se këto ishin vetëm thashetheme.
Vitin e kaluar, piloti britanik zgjati kontratën me Mercedesin deri në vitin 2025.
Në dy vjetët e fundit, Hamilton nuk ka arritur asnjë fitore të vetme në Formula 1, rekordi i të cilit është 103 fitore./Gazeta Express